Église de Laffite-Toupière.
Registre de visites H Malte reg 413, fol. 437 v°.

Membre de Lafite-Toupiere, depandant de ladite commanderie de Monsaunés

Registre de visites H Malte reg 413, fol. 438 r°.

À l’instant, nous dictz commissaires, continuant l’execussion de nostre commission, sommes partys dudit lieu de Mazerettes et allés au lieu et membre de Lafite-Toupiere, depandant dudit Monsaunés, distant l’un de l’autre une petite lieue, où estant et ayant trouvé messire Jean Cazeneufve, prebstre, vicaire perpetuel dudit lieu, dans le lit malade, avons mandé à querir Michel Caseneufve son frere, fermier dudit membre, ensemble les marguilliers de l’esglise qui sont Vesian Pigot, marguillier du Corpore Christi, Bertrand Cazeneuve, de Nostre-Dame, Pierre Verger, de Saint-Michel et Joachin Fontan, marguillier du Purgatoire. Lesquelz estant illec venus avec Jean Parenteau et Jean Dambruin, consulz dudit lieu, leur avons faict entendre comme nous estions illec venus pour voir et visiter tout ce qui appartient audit sieur commandeur de Monsaunés audit lieu et parce que le vicaire perpetuel dudit lieu est malade, les avons requis nous y vouloir servir, ce qu’ilz ont promis faire. Auquel effect, leur avons faict prester le sermant en tel cas requis.

Registre de visites H Malte reg 413, fol. 438 v°.

Et parce qu’il est expediant de commancer par les choses sacrées en la compaignie des susdictz, sommes allés en l’esglise dudit lieu qui est parrossielle, desdiée soubz le tiltre de saint Michel et jaçoit qu’elle soit de la donnation dudit sieur commandeur de Monsaunés, sy est-ce toutesfoys que ledit Caseneufve prebstre, mesprisant l’ordre, par tollerance des commandeurs precedans, auroit obtenu ledit beneffice par voye de Rome. C’est pourquoy seroit necessaire et ledit Cazeneufve estant à presant vieux, de luy faire tiltre de nouveau et luy inhiber de s’ayder aulcunement de sa prethendue resignation, comme n’estant les benefices de nostre ordre subjectz de ce ; de quoy sera admonesté ledit sieur commandeur.
Ce fait, avons remarqué ladite esglise, qui est dans le diocese de Comenge, estre bastie de pierre, en forme carrée, n’ayant point de clocher et toutesfoys y ayant deux cloches au-dedans ladite esglise. Et au-devant ladite esglise y ayant un couvert sur quatre pilliers de bois.
Ladite esglise n’est point voultée ny pavée et du costé

Registre de visites H Malte reg 413, fol. 439 r°.

de la porte, une tribune qui va tout le large d’icelle esglise et son cœur estant fermé de barreaux de bois de la hauteur de troys pans seulement. Dans ledit cœur est le grand autel, au-dessus duquel y a un restable de bois peint et un tabernacle couvert du voyle de raze violette avec une croix et passemant rouge,
le devant estant de toille peint fort vieux ;
ledit autel garny de troys napes et de sa pierre sacrée en bon estat.
Au-dessus, y a aussy deux chandelliers de bois. Dans ledit tabernacle repose le Saint Sacrement, lequel in habitu decenti ayant visité avec les prieres necessaires, avons trouvé icelluy dans un ciboire d’estaing bien tenu.
Au-devant ledit grand autel, y a une lampe où il y a tousjours lumiere, à cause du Saint Sacrement. Laquelle lampe, lesdictz marguilliers ont dict s’entretenir aux despans de ce qui s’amasse aux bassins. Auprés dudit autel, y a deux croix de fer blanc servantz aux processions.
À chasque coing dudit autel, y a un chandellier de bois.

Registre de visites H Malte reg 413, fol. 439 v°.

Au fonds de ladite esglise sont les fontz baptismalles, lesquelles avons treuvées en bon estat, fermant à clef, les cresmiers estant d’estaing et vaze à mettre l’eau de cuivre.
Ornemans
Sy nous ont exibé lesdits marguilliers tous les ornemens de ladite esglise qui sont :
Premierement six napes ;
Plus deux aubes, une bonne et l’autre fort usée ;
Plus une chasuble de damas caffard verd et blanc ;
Plus un pluvial de damamas (sic) caffart incarnat et blanc, n’y ayant point de chasuble des mortz ;
Plus un calice d’estaing avec sa patenne ;
Plus un paire de corporaux et un corporallier rouge et cramoysy.
Et pour ce qui est des droitz que ledit sieur commandeur a audit lieu, nous ont dict lesdictz consulz que ledit sieur commandeur est seigneur justicier haut, moyen et bas, fontier direct, spirituel et temporel. En ceste qualité, met les consulz qui exercent la justice. A le dixme de tous grains, vin, foing, aigneaus,

Registre de visites H Malte reg 413, fol. 440 r°.

chevraux, laine, poulins, veaux, oyes et pouletz et tire sur les habitans de chasque bestailh gros annuellement un carollus vallant dix deniers.
Le dixme du bled et autres grains se prend de dix un et le foing de doutze pilotz un et de pouletz, laine, aygneaux, oysons, poulains et veaux de dix un.
A aussy ledit sieur commandeur toutes les cencives dudit lieu à raison d’un sol pour arpant de terre, vigne, pred ou bois.
Et tire des consulz à une seule main annuellement la quantité de doutze cestiers bled pour le droit de fournage et fouage et quelques gelines.