Église de Mazères.
Registre de visites H Malte reg 413, fol. 433 v°.

Membre de Mazerettes, depandant et annexe de Monsaunés

Registre de visites H Malte reg 413, fol. 434 r°.

Ledit jour, nous ditz commissaires, ayant parachevé de proceder à la visite desditz lieux d’Aussens et Plaignes, sommes retournés au lieu de Mazeretes, distant dudit Monsaunés une lieue et dudit Aussens deux grandes lieues, membre et annexe dudit Monsaunés, où estant arrivés sur une heure aprés midy, avons illec trouvé ledit Mondilhon prebstre, vicaire perpetuel dudit Monsaunés et Mazerettes, sommes tous ensemble avec ledit Buisson nostre secrettaire, entrés dans l’esglise dudit lieu et ayant faict noz prieres, avons remarqué ladite esglise estre bastie de pierre fort basse et n’estant encore parfaite, ayant un petit colocher (sic) avec deux cloches et le bois d’une desdites cloches estant presque tout pourry. Ladite esglise n’est point voultée ny pavée et ayant son cœur fermé d’une mechante murailhe et dans icelluy cœur, y ayant troys autelz, sçavoir le grand et à chasque costé dudit grand autel, y en a un autre. Ledit Mandilhon nous a dict ladite esglise estre desdiée soubz le tiltre de saint Cristophle et estre de mesme diocese que le lieu de Monsaunés et ladite esglise estre à la donnation dudit sieur commandeur et en ceste qualité, avoir faict tiltre à icelluy Mandilhon.

Registre de visites H Malte reg 413, fol. 434 v°.

Ledit grand autel est garny d’un devant de raze blanc avec de passemans rouges et au-dessus un restable où sont peintz plusieurs personnages et entre autres saint Christophle, patron de ladite esglise.
Plus y a un tabernacle de bois peint de diverses colleurs où repose le Saint Sacremant sans aulcune lumiere. Lequel Saint Sacrement nous avons visité avec l’honneur et la descence requise et trouvé estre dans un ciboire d’argent ayant un soleil d’argent doré pour mestre en evidance le Saint Sacrement, le tout trés bien tenu, sauf qu’il est necessaire d’y avoir lumiere devant le Saint Sacrement. Ledit grand autel garny de troys napes et de sa pierre sacrée, comme aussy les autres deux autelz qui sont proches dudit grand autel, estant bien tenus et en bon estat, au milieu dudit cœur y ayant une lampe de laton sans lumiere.
Dans la nef de ladite esglise, est la chaire du predicateur. Au fondz de ladite esglise, y a une tribune traverssant icelle entierement, le bois estant tout pourry, à cause que l’esglise audit endroit est toute descouverte, y pleuvant partout et audit endroit, les chevrons estans tous pourris, e[s]t trés necessaire de pourvoir promptement à la

Registre de visites H Malte reg 413, fol. 435 r°.

reparation de ladite esglise. Autrement, est dangereux que ladite esglise s’en ira en ruine, y ayant des chevrons rompus.
Ornemens
Ce faict, estant illec presans Guilhem Helies, consul et Mathieu Manenc, baile, avons visité les ornemens et trouvé y avoir :
Premierement un calice d’argent avec sa patenne en bon estat ;
Plus une croix de laton servant aux processions ;
Plus une chasuble de taffetas blanc avec de passemant d’or ;
Plus sept napes ;
Plus autres troys chasubles fort usées ;
Plus autre chasuble de satin à fleurs toute neufve avec le pluvial de gros de Naples à fleur, garny aussy de passemant de soye ;
À ladite esglise, n’y a point de secristie ;
Plus y a un corporallier et quatre paires de corpouraux dans ledit corporallier, qui est de vellours à fonds d’or ;
Plus un missel du concille avec un rituel et outilier.
Ladite esglise du costé de l’autel estant en forne (sic) carrée et y pleuvant partout dedans.

Registre de visites H Malte reg 413, fol. 435 v°.

Comme aussy, ladite esglise a besoing de paver et mestre à niveau, les tombeaux qui sont dedans estant trop relevés.
Ce faict, avons visité les fondz baptismalles, lesquelles sont auprés de la porte de ladite esglise, qu’avons trouvées estre en bon estat, fermant à clef et ayant les cremiers d’estaing et le vaze pour mettre l’eau de cuivre.
Et estans sortis hors ladite esglise, avons trouvé icelle du costé de l’autel, la paroist estre fort gastée et sappée et a besoing de reparer ; autrement, est dangereux d’aller entierement en ruine.
Surquoy les consulz dudit lieu, accompaignés de la plus grande partye des habitans, lesquelz nous ont remonstré que ledit Mandilhon, vicaire perpetuel, ensemble tous les prebstres qui ont esté en ladite esglise avant luy, avoir acostumé de dire une messe haute ; mais despuis quelque temps en çà, ledit Mandilhon n’en dict point.
Comme aussy, ilz n’ont point de messe matutinalle, laquelle ilz ont volleu et voudroint

Registre de visites H Malte reg 413, fol. 436 r°.

faire celebrer à leurs despans. Ausquelles fins, auroint arresté un prebstre, mais ledit Mandilhon, pour ce empecher, n’a volleu jamais prester de calice ny d’ornemans. C’est pourquoy il nous plairra enjoindre audit Mandilhon de bailler et fournir au prebstre qui viendra pour celebrer la messe matutinalle, de calice et autres ornemens necessaires, veu qu’ilz la font celebrer à leurs despans, n’y alant rien du sien, ce qui a esté faict.
Semblablement, nous ont remonstré qu’il y a forces pauvres ceste année dans ledit lieu, qui n’ont moyen de se substanter et d’autant que revenu que tire audit lieu ledit sieur commandeur est assés bon, vallant annuellement mille livres, nous ont suppliés vouloir ordonner une aumosne pour acister à la norriture des vrays pauvres dudit lieu et juridiction. Surquoy avons ordonné audit sieur commandeur et en son absance à son fermier, payer pour la presante année la somme de quarante livres, sans tirer à consequance le tout, suivant l’ordonnance qu’en avons faict expedier à nostre dict secrettaire et expediée ausditz consulz.