Métaierie du Beyrié.
Registre de visites H Malte reg 413, fol. 425 v°.

Maisterie dudit commandeur
Tout proche dudit lieu, ledit sieur commandeur a une mesterie où estans allés, avons trouvé icelle bastie à basse estaige de murailhe de pierre couverte de tuile canal, y ayant le logement du mestaier, appellé Arnaud Rouede et le logement du bestailh ; ladite mesterie ayant grand besoing de reparer du costé de dernier, la murailhe estant toute rompue et aussy du costé de l’estable du bestailh et a besoing de rabatre de chaux et sable.
Ledit Rouede mestaier nous a dict ladite mesterie contenir deux paires de labouraige et n’y a guieres pred.
Au-devant ladite mesterie, y a un couvert où est le foing pour le service de ladite mesterie.

Registre de visites H Malte reg 413, fol. 426 r°.

Sy, nous a dit ledit mestaier y avoir troys paires de bœuf de l’estat, lesquelz sont fort vieux et seroit besoing de les changer et y en mestre d’autres jeunes. Plus a dit y avoir une jumant poil rouge fort vieilhe avec deux polines jeunes apartenant aussy à l’estat de ladite commanderie.
Toutes laquelle mesterie et terres en despandant estant nobles.
Et c’est tout le domaine que ledit sieur commandeur a audit lieu.
Et pour ce qui est de la seigneurie dudit lieu, Jean de Saint-Germés et Jean Mourlans et plusieurs autres habitans dudit lieu estant illec presans avec ledit Betmalle fermier, ont dict ledit sieur commandeur estre haut justicier, moyen et bas dudit lieu, foncier, direct, spirituel et temporel, pour raison de quoy prend la dixme de tous grains, vin, foing, lin, laine, aigneaux, oysons, poulins, veaux, conilhetz , carbes et toutes autres choses, à raison de dix un.
Plus, fait les consulz et officiers dudit lieu tant pour la police que exercer la justice et est juge maistre Olivier, docteur et advocat en la cour de parlement de Tholouze,

Registre de visites H Malte reg 413, fol. 426 v°.

lieutenant maistre Valibus, advocat, demeurant à Salies, greffier, ledit Betmalle fermier et baille Jean Pelarase et procureur d’office maistre Pierre Trignan du lieu de Lestelle, qui ont esté institués par ledit sieur commandeur.
Plus tire les cencives de tout ledit lieu et juridiction qui peuvent valloir annuellement quarante livres d’argent. Plus prend, outre lesdites cencives, de chascun feu allumant, une gelline , un boysseau avoine et une mesure bled de fouaige et fournaise et un sol pour arpant de terre de fief. Par la visite antienne faite en l’an mil cinq cens cens (sic) quarante, est porté expressement que lesdictz habitans payront soixante gelines de fouaige et un cestier advoine.
Tout le revenu que ledit sieur commandeur tire audit lieu, y comprins les agriers de Cassaigne, proche dudit lieu, qui valent vingt livres, les droitz que ledit sieur commandeur [a] à Arbon qui valent troys livres et les droitz cencif qu’il tire à Valentine qui valent troys livres, s’afferme annuellement huit cens livres.
Oultre ce, paye ledit Betmalle fermier toutes charges,

Registre de visites H Malte reg 413, fol. 426 r°.

sçavoir au vicaire perpetuel vingt huit sestiers bled, trente livres en argent et troys pipes de vin et les gaiges des officiers.
Au moyen de quoy, ledit Mondilhon vicaire perpetuel, est tenu et obligé faire servir ladite esglise de Montsaunés, celle de Mazerettes et celle de Figarol annexes, auquel effect, tient deux prebstres, à chascun desquelz paye annuellement de pension cinq cestiers bled et verrouilh de l’esglise, un pour servir l’esglise de Figarol et l’autre qui sert celle de Montsaunés ; ledit Mandilhon demeurant audit lieu de Mazerettes, desquoy les habitans se plaignent, attandu qu’estant ledit lieu de Monsaunés le chef, le vicaire perpetuel s’y doit tenir.